Luke 19

Jesus mo Zacchaeus

1Jesus ga ulu adu gi Jericho, ga hana laa lodo di waahale. 2Tagi hagabudu dagitedi i golo, dono ingoo go Zacchaeus, tangada maluagina. 3Mee e hiihai gi gidee ia a Jesus, be mee tangada e hai behee. Gei Zacchaeus tama dangada hua dulii e deaadee di mmada gi Jesus, idimaa digau dogologowaahee. 4Gei mee ga lele gi mua digau dogologo aalaa, ga gaga gi tomo di laagau-‘sycamore’ bolo gi gidee ia Jesus dela ga hanimoi laa laa. 5Di madagoaa Jesus ne dau i golo, geia ga mmada aga gi nua, ga helekai, “Zacchaeus, hagalimalima, gaga ia gi lala, au e hai gi noho i doo hale dangi nei.” 6Zacchaeus ga gaga ia hagalimalima gi lala, ga haga ulu a mee gi lodo dono hale i di tentene huoloo. 7Digau huogodoo ala ne mmada gi di mee deenei, ga daamada ga helehelekai tamu, “Taane deenei gu ulu gi lodo di hale o tangada huaidu!” 8Zacchaeus ga duu i-nua ga helekai gi Tagi, “Hagalongo meenei, au ga wanga di baahi ogu goloo gi digau hagaloale, hila hua au gu halahalau dagu dangada, gei au ga hui gi mee nnolongo haga haa gi nonua.” 9Gei Jesus ga helekai, “Dangi nei di haga mouli gu-(tale) i di hale deenei, i taane deenei la tangada i di madawaawa o Abraham. 10Tama Tangada ne hanimoi belee halahala ge e haga mouli digau ala gu nngala.” ^a

Di ala kai o nia bahihadu goolo

(Matthew 25.14-30)

11Di madagoaa hua digaula nogo hagalongo, gei Jesus ga kai labelaa dana ala kai, idimaa, mee gu hoohoo adu gi Jerusalem, gei digaula e hagabau bolo Tenua o God la gu hoohoo ga gila aga. 12Gei Jesus ga helekai, “Tangada aamua ne hana gi tenua mogowaa belee hai di king. Nomuli, geia ga hanimoi labelaa gi dono hale. 13I mua dono hagatanga, gei mee ga gahi mai ana gau hai hegau dilongoholu, ga wanga ginai ana bahihadu goolo dagidahi, ga helekai boloo, Goodou mmada be dehee di godou hai e haga hai hegau nia bahihadu aanei i dogu madagoaa ma ga de igolo i godou baahi. 14Gei nia daangada donu o maa gu de hiihai gi mee, gu hagau nadau gau hai hegau i muli o mee, ga helekai, Gimaadou e de hiihai gi taane deenei e hai di madau king. 15Taane deelaa la ga hai di king, ga hanimoi, gei mee ga haga iloo gi ana gau hai hegau, bolo gi loomoi gi ono mua, e hagadina nia bahihadu e hia ne wiini. 16Tangada matagidagi ga hanimoi ga helekai boloo, Agu bahihadu goolo ne kila mai e madangaholu mai i di bahihadu e dahi dela ne gaamai kooe. 17Tangada aamua deelaa ga helekai, Gu humalia, goe tangada hai hegau humalia. Idimaa goe dela ne hai hegau huudonu i nia mee lligi, au ga dugu goe e dagi au waahale llauehe madangaholu. 18Togolua dangada hai hegau ga hanimoi, ga helekai, Meenei, au gu kila mai agu bahihadu goolo e lima mai i di bahihadu e dahi dela ne gaamai kooe. 19Taane aamua ga helekai gi tangada hai hegau deenei, Goe ga dagi au waahale llauehe e lima. 20Tangada hai hegau labelaa i golo ga hanimoi, ga helekai, Meenei, deenei dau bahihadu. Au nogo dugu hagammuni di maa i lodo di angkadi. 21Au nogo madagu i di goe, idimaa, goe tangada de daawa i oo waalanga. Goe e kae nia mee ala hagalee nia mee ni aau, gei e hadi nia mee ala hagalee ni aau ne dogi. 22Taane aamua deelaa ga helekai gi mee, Goe tangada hai hegau huaidu. Au ga hagi aga goe i au helekai, e hagahuaidu goe. Goe e iloo bolo au tangada de daawa i ogu waalanga, e kae nia mee ala hagalee nia mee ni aagu, gei e hagi nia mee hagalee ni aagu ne dogi. 23Malaa, e aha dela goe digi dugua agu bahihadu gi lodo di bank? Gei au ga kumi nia maa mo dono wiini i dogu hanimoi. 24Gei taane aamua ga helekai gi digau ala e tuu i golo, Daawa di bahihadu goolo dela i mee, wanga ina gi tangada dela ana bahihadu goolo e madangaholu. 25Gei digaula ga helekai gi mee, Meenei, mee ana bahihadu goolo e madangaholu. 26Gei mee ga helekai, Au e hagi adu gi goodou bolo digau ala nadau mee i golo, gei e wanga labelaa ginai gi logo gi nonua. Gei digau ala nadau mee ai, nia mee hua dulii ala i nadau baahi, le e daa gi daha mo digaula. ^b 27Gei ogu hagadaumee ala e de hiihai bolo au e hai di nadau king, laha mai digaula, daaligidia i ogu mua gi mmade.”

Jesus e ulu i Jerusalem i dono aali

(Matthew 21.1-11; Mark 11.1-11; John 12.12-19)

28Muli Jesus ne helekai nia mee aanei, gei mee ga hana i mua digaula gi Jerusalem. 29Dono dau hua gi Bethphage mo Bethany i di Gonduu Olib, gei mee ga hagau ana dama agoago dogolua gi mua mo ana helekai boloo, 30“Hula gi tama waahale dela i gulu mua. Goolua ga ulu gi lodo, ga gidee tamaa-‘donkey’ e daula, gei digi hana ai tangada nonua. Weedee, dagia mai gi kinei. 31Maa tangada ga heeu adu be goolua e wwede di maa eimaha, gei goolua helekai boloo, Di Tagi e hiihai e hai hegau i di maa.” 32Meemaa ga hula ga gidee nia mee huogodoo ala nogo helekai ai a Jesus. 33Di madagoaa hua meemaa e wwede tamaa-‘donkey’, gei digau di nadau manu, ga heeu gi meemaa, “Goolua e wwede di maa eimaha?” 34Meemaa ga helekai, “Di Tagi e hiihai e hai hegau i di maa.” 35Meemaa ga dagi tamaa-‘donkey’ gi Jesus, ga kili nau gahu gi hongo di manu, ga hagamaamaa a Jesus e gaga gi hongo di maa. 36Di gaga o mee ga hana, gei nia daangada ga holo nadau gahu gi hongo di ala. 37Dono hoohoo gi Jerusalem, i di gowaa dela iei di ala e hana gi lala i di Gonduu Olib, ana dama agoago huogodoo ga daamada ga dadaahili mo di hagaamu a God i nadau lee moogo gi nua i nia mee haga goboina huogodoo ala ne mmada ginai ginaadou, 38ga helekai boloo,

“God gi haga maluagina ina di king dela e hanimoi i di ingoo o Dimaadua! Di aumaalia i di langi, mo di madamada ang gi God!” ^c
39Gei hunu Pharisee nogo i lodo digau dogologo ga helekai gi Jesus, “Tangada Agoago, helekai gi au dama agoago bolo gi noho dee muu!” 40Jesus ga helekai, “Au e hagi adu gi goodou bolo maa digaula ga noho dee muu, gei nia hadugalaa ga daamada ga wwolowwolo gi nua loo.”

Jesus e madatangi gi Jerusalem

41Jesus ne hoohoo adu ga gidee ia di waahale Jerusalem, ga madatangi, 42ga helekai, “Maa nei boloo goe gu iloo dangi nei be di maa di aha dela e humalia gi di noho i di aumaalia! Gei goe e de gidee di maa dolomeenei. 43Di madagoaa ga dae mai, gei oo hagadaumee ga haganiga goe mo nadau mee abaaba, ga duuli goe gi lodo, ga mmaanege mai i nia baahi huogodoo. 44Digaula ga oho goe hagatau mo digau ala i lodo doo abaaba, ga deai di hadu e dahi e dubu ai, idimaa, goe digi modongoohia di madagoaa a God ne hanimoi belee haga dagaloaha goe gi daha mo di made!”

Jesus e hana gi di Hale Daumaha

(Matthew 21.12-17; Mark 11.15-19; John 2.13-22)

45Jesus ne hana gi lodo i di Hale Daumaha, ga hagabagi digau huihui mee, 46ga helekai, “Ma gu hihi i lodo di Beebaa Dabu boloo: Dogu Hale Daumaha la di hale dalodalo, gei goodou gu hai di maa be di gowaa pala hagammuni digau gaiaa!” ^d 47Nia laangi huogodoo Jesus e hai ana agoago i lodo di Hale Daumaha. Gei nia dagi aamua hai mee dabu, digau haga dondonu haganoho, nia dagi o nia daangada gu hiihai belee daaligi a mee gi made. ^e 48Gei digaula digi gida di nadau hai belee daaligi a mee, idimaa, digau huogodoo e hiihai e hagalongo, ge hagalee hiihai e diiagi telekai e dahi i ana helekai.